आज तिसऱ्या टप्प्यातील मतदान : या ठिकाणाच्या उमेदवारांची प्रतिष्ठा पणाला

44

पुणे : महाराष्ट्रत पहिल्या टप्प्यातील 7 जागांसाठी मतदान 11 एप्रिलला, दुसऱ्या टप्प्यातील 10 जागांसाठी मतदान 18 एप्रिलला पार पडले. आता तिसऱ्या टप्प्यातील 14 जागांसाठी मतदान आज म्हणजेच 23 एप्रिलला पार पडणार आहे. या सर्व 14 जागांवर चुरशीच्या लढती पाहायला मिळतात. या जागांवर आपले निवडणून येण्यासाठी तसेच विद्यमान खासदारांनी आपले वर्चस्व कायम ठेवण्यासाठी प्रतिष्ठा पणाला लावली आहे. जाणून घेऊया कोणत्या मतदारसंघात कोणता उमेदवार नशीब आजमावत आहे.

माढा लोकसभा मतदारसंघ : राज्यसह देशभरात माढा मतदारसंघ चर्चेत राहिला आहे, कारण येथून राष्ट्रवादीचे अध्यक्ष शरद पवार लढणार होते. पण, ऐनवेळी त्यांनी माघार घेतल्याने अनेक राजकीय हालचाली इथे घडल्या. यावेळी भाजप पुरस्कृत जिल्हा परिषद अध्यक्ष संजय शिंदे यांना राष्ट्रवादीने तिकीट दिले, तर काँग्रेसमधून भाजपवासी झालेल्या रणजितसिंह नाईक निंबाळकर यांना भाजपने तिकीट दिले आहे. त्यामुळे लढत चुरशीची होणार आहे.

संजय शिंदे (राष्ट्रवादी) / रणजितसिंह नाईक निंबाळकर (भाजप)

बारामती लोकसभा मतदारसंघ : बारामतीमधून यावेळसही राष्ट्रवादीने सुप्रिया सुळेंना उमेदवारी दिली आहे. भाजपकडून आमदार राहुल कुल यांच्या पत्नी कांचन कुल यांना उमेदवारी देण्यात आली आहे, तर वंचित बहुजन आघाडीने नवनाथ पडळकर यांना तिकीट दिले आहे. मुख्यमंत्र्यांसह भाजप, शिवसेनेच्या अनेक मोठ्या नेत्यांनी कांचन कुल यांच्यासाठी प्रचार केला असल्याने, सुप्रिया सुळे यांना मोठे आव्हान यावेळी असणार आहे.

सुप्रिया सुळे (राष्ट्रवादी) / कांचन कुल (भाजप) / नवनाथ पडळकर (वंचित बहुजन आघाडी)

रायगड लोकसभा मतदारसंघ : शिवसेनेने विद्यमान खासदार आणि केंद्रीय मंत्री अनंत गीते यांना यावेळसही उमेदवारी दिली आहे, तर राष्ट्रवादीने सुनील तटकरे यांना निवडणूक रिंगणात उतरवले आहे. त्यामुळे येथे चुरशीची लढाई पाहायला मिळणार आहे. यंदाही सुनील तटकरेंच्या नावाचे दोन आणखी ‘सुनील तटकरे’ रिंगणात आहेत.

नंत गीते (शिवसेना) / सुनील तटकरे (राष्ट्रवादी)

कोल्हापूर लोकसभा मतदारसंघ : कोल्हापूरमध्ये यंदा चुरशीची लढत असणार आहे, कारण मागीलवेळी काँग्रेसचे आमदार सतेज पाटलांच्या मदतीने विजयी झालेल्या धनंजय महाडिकांनी यंदा मात्र सतेज पाटलांशी वैर घेतले आहे. त्यामुळे धनंजय महाडिकांना मोठा फटका बसण्याची शक्यता आहे.

धनंजय महाडिक (राष्ट्रवादी) / संजय मंडलिक (शिवसेना)

रत्नागिरी-सिंधुदुर्ग लोकसभा मतदारसंघ : यावेळसही रत्नागिरी-सिंधुदुर्ग मतदारसंघात शिवसेनेने विद्यमान खासदार विनायक राऊतांना उमेदवारी दिली आहे, त्यामुळे राऊत विरूद्ध राणे अशी लढत पाहायला मिळणार आहे तर यंदा काँग्रेसकडून नवीनचंद्र बांदिवडेकर हे लढत आहेत.

विनायक राऊत (शिवसेना) / निलेश राणे (महाराष्ट्र स्वाभिमान पक्ष) / नवीनचंद्र बांदिवडेकर (काँग्रेस)

सातारा लोकसभा मतदारसंघ : या निवडणुकीत राष्ट्रवादीचे विद्यमान खासदार उदयनराजे भोसले रिंगणात आहेत. त्यांना राष्ट्रवादीतून भाजपमध्ये आणि भाजपमधून शिवसेनेते गेलेल्या नरेंद्र पाटीलांचे आव्हान असणार आहे. नरेंद्र पाटील हे माथाडी कामगारांचे नेते आहेत, पण या मतदारसंघात उदयनराजे भोसले यांना मानणारा वर्ग मोठा आहे. त्यामुळे नरेंद्र पाटीलांना मोठे आव्हान असेल.

उदयनराजे भोसले (राष्ट्रवादी) / नरेंद्र पाटील (शिवसेना)

हातकणंगले लोकसभा मतदारसंघ : हातकणंगले लोकसभा मतदारसंघातून हॅटट्रिक साधण्यासाठी खासदार राजू शेट्टी तयार झालेत. पण, यंदा ते आघाडीच्या गोटात आहेत. राजू शेट्टींना यंदा निवेदा माने यांचा मुलगा धैर्यशील माने टक्कर देणार आहेत.

राजू शेट्टी (स्वाभिमानी शेतकरी संघटना) / धैर्यशील माने (शिवसेना)

सांगली लोकसभा मतदारसंघ : यावेळी सांगलीत अत्यंत चुरशीची लढाई पाहायला मिळणार आहे. काँग्रेसचा बालेकिल्ला असणारा हा मतदारसंघ काँग्रेसने स्वाभिमानी शेतकरी संघटनेला दिला, त्यामुळे नाराज झालेल्या वसंतदादांचे नातू प्रतिक पाटील यांची समजूत कढण्यासाठी स्वाभिमानीने थेट विशाल पाटील यांनाच उमेदवारी दिली. तर दुसरीकडे पुन्हा एकदा संजयकाका पाटील रिंगणात आहेत. पण यावेळी वंचित बहुनज आघाडीकडून गोपीचंद पडळकर यांनी निवडणूक रिंगणात उडी घेतली आहे, त्यामुळे लढत चुरशीची असेल.

विशाल पाटील (स्वाभिमानी शेतकरी संघटना) / संजयकाका पाटील (भाजप) / गोपीचंद पडळकर (वंचित बहुजन आघाडी)

अहमदनगर लोकसभा मतदारसंघ : यावेळी दक्षिण नगरच्या जागेवरुन मोठा गदारोळ पाहायला मिळाला होता. राज्यातील सर्वात महत्तावाची लढत म्हणून या जागेकडे पाहिले जात आहे. कारण काँग्रसचे वरिष्ठ नेते आणि विधानसभेचे विरोधी पक्षनेते राधाकृष्ण विखे पाटील यांचे सुपुत्र सुजय विखे पाटील हे भाजपकडून, तर राष्ट्रवादीचे आमदार संग्राम जगताप हे राष्ट्रवादीकडून लढत आहेत. दक्षिण नगरचा नेता कोण, यासाठी मोठी चुरस संग्राम जगताप आणि सुजय विखे या दोन तरुण उमेदवारांमध्ये दिसून येत आहे.

सुजय विखे पाटील (भाजप) / संग्राम जगताप (राष्ट्रवादी)

पुणे लोकसभा मतदारसंघ : यावेळी पुण्यातून भाजपने विद्यमान खासदाला तिकीट न देता, पालकमंत्री गिरीश बापट यांना संधी दिली आहे, तर काँग्रेसने मोहन जोशी यांना उमेदवारी दिली आहे. फारशी चुरशीची लढत नसली, तरी गिरीश बापट यांच्यासाठी ही लढत सोपीही नाही.

गिरीश बापट (भाजप) / मोहन जोशी (काँग्रेस)

औरंगाबाद लोकसभा मतदारसंघ : यावेळीही औरंगाबादमध्ये अत्यंत चुरशीची लढत पाहायला मिळणार आहे. चंद्रकांत खैरे यांना यंदा वंचित बहुजन आघाडीकडून एमआयएमचे आमदार इम्तिजाय जलील यांचे आव्हान असेल. त्याशिवाय, रावसाहेब दानवे यांचे जावई आणि शिवसेनेचे माजी आमदार हर्षवर्धन जाधव हे अपक्ष म्हणून औरंगाबादमधून लढत आहेत. दुसरीकडे, काँग्रेस आमदार अब्दुल सत्तार यांनीही बंड केल्याने निवडणूक अत्यंत चुरशीची झाली आहे. तर काँग्रेसडून त्यांना सुभाष झाम्बड यांचे आव्हान असणार आहे.

चंद्रकांत खैरे (शिवसेना) / सुभाष झाम्बड (काँग्रेस) / इम्तियाज जलील (वंचित बहुजन आघाडी) / हर्षवर्धन जाधव (अपक्ष)

जालना लोकसभा मतदारसंघ : जालना मतदारसंघावरुन मोठा गदारोळ पाहायला मिळाला होता. शिवसेनेचे मंत्री अर्जुन खोतकर हे जालन्यातून लढण्यास इच्छुक होते. मात्र, युती झाल्याने त्यांच्या आपेक्षावर पाणी पडले. अखेर मुख्यमंत्री आणि उद्धव ठाकरे यांच्या मध्यस्थीनंतर खोतकरांनी माघार घेतली आणि दानवेंची उमेदवारी भाजपकडून जाहीर झाली. यावेळी आमदार बच्चु कडू यांनी काँग्रसचे उमेदवार विलास औताडेंना पाठींबा दिल्याने लढत चुरशीची असेल.

रावसाहेब दानवे (भाजप) / विलास औताडे (काँग्रेस)

रावेर लोकसभा मतदारसंघ : रावेरमधून यंदाही रक्षा खडसे यांचेच पारडे जड असेल, असs राजकीय विश्लेषकांचे मत आहे. काँग्रेसने उल्हास पाटील यांना तिकीट दिले आहे. चुरशीची लढत नसली तरी यावेळी मोदी लाट नसल्याने लढत महत्तावाची ठरेल.

रक्षा खडसे (भाजप) / उल्हास पाटील (काँग्रेस)

जळगाव लोकसभा मतदारसंघ : जळगावात भाजपने आधी स्मिता वाघ यांना तिकीट दिले होते, पण त्यांचे तिकीट काढून घेऊन उन्मेश पाटील यांना तिकीट दिले त्यामुळे जळगावात मोठा गोंधळ पाहायला मिळाला होता. राष्ट्रवादीने गुलाबराव देवकर यांना रिंगणात उतरवले आहे त्यामुळे ही लढतदेखील चुरशीची असेल.

उन्मेश पाटील (भाजप) / गुलाबराव देवकर (राष्ट्रवादी)