मुकेश अंबानी रोज कमावतात ३०० कोटी रुपये

133

नवी दिल्ली : देशातील सर्वात श्रीमंत व्यक्ती असलेले मुकेश अंबानी यांच्या संपत्तीत गेल्या वर्षी प्रतिदिन ३०० कोटी रुपयांनी वाढल्याचे स्पष्ट झाले आहे. ‘बार्कलेज हुरुन इंडिया रिच लिस्ट २०१८’मध्ये हा खुलासा करण्यात आला आहे. रिलायन्स इंडस्ट्रीजचे चेअरमन मुकेश अंबानी ३ लाख ७१ हजार कोटी रुपयांच्या संपत्तीसह यादीत गेल्या सात वर्षांपासून प्रथम स्थानी विराजमान आहेत. एका वर्षात त्यांच्या कंपनीच्या समभागांच्या भावात ४५ टक्क्यांची वाढ झाली आहे.

विशेष म्हणजे, एकट्या मुकेश अंबानी यांची संपत्ती या यादीत असलेल्या दुसऱ्या, तिसऱ्या आणि चौथ्या स्थानी असलेल्या अनुक्रमे एस. पी. हिंदुजा आणि कुटुंब, एल. एन. मित्तल आणि कुटुंब आणि अजीम प्रेमजी यांच्या एकत्रित संपत्तीहून अधिक आहे. एम. पी. हिंदुजा यांची संपत्ती १ लाख ५९ हजार कोटी रुपये, एल. एन. मित्तल यांची १ लाख १४ हजार कोटी आणि अजीम प्रेमजी यांची संपत्ती आहे ९६ हजार १०० कोटी रुपये.

बार्कलेज हुरुन इंडिया रिच यादीत ज्यांची संपत्ती १००० कोटी रुपयांहून अधिक आहे अशा भारतीय श्रीमंतांचा समावेश करण्यात आला आहे. २०१८च्या यादीत गेल्या वर्षीच्या यादीच्या तुलनेत एक तृतियांश अधिक व्यक्तींचा समावेश झाला आहे. अशा प्रकारे २०१७मध्ये या यादीत ६१७ लोकांचा समावेश होता. यावर्षी मात्र ही संख्या ८३१वर पोहोचली आहे. श्रीमंतांची ही संख्या २०१७मधील श्रीमंतांच्या तुलनेत २१४ने अधिक आहे. यादीत समावेश असलेल्या श्रीमंत व्यक्तींची संपत्ती ७१९ अब्ज डॉलर इतकी असून ती देशाच्या २८५० अब्ज डॉलर इतक्या जीडीपीच्या एक चतुर्थांश असल्याचे आयएमएफच्या एप्रिल २०१८मधील प्रसिद्ध आकडेवारीच्या हवाल्याने या यादीत म्हटले आहे.

या यादीत सन फार्माचे दिलीप संघवी पाचव्या स्थानी आहेत. तर कोटक महिंद्रा बँकेचे उदय कोटक ७८६०० कोटी रुपयांच्या संपत्तीसह यादीत सहाव्या स्थानी आहेत. ७३ हजार कोटी रुपयांच्या संपत्तीसह सातव्या स्थानी आहेत सीरम इन्टिट्यूट ऑफ इंडियाचे सायरस एस. पूनावाला, तर ७१ हजार २०० कोटी रुपयांच्या संपत्तीसह आठव्या स्थानी आहेत अडानी एंटरप्राइजेसचे गौतम अडानी. या अहवालात भारतातील टॉप महाधनवान कुटुंबाचाही समावेश करण्यात आला आहे. अंबानी कुटुंब यादीत सर्वात वरच्या स्थानी आहे, तर अंबानीनंतर गोदरेज, हिंदुजा, मिस्त्री, संघवी, नाडर, अडानी, दमानी, लोहिया आणि बर्मन कुटुंबांचा क्रमांक लागतो.