अन् ‘त्यांनी’ टेरेसवरच विवाह सोहळा उरकला

101

करोना विषाणूच्या प्रादुर्भावामुळे सध्या राज्य सरकारने खबरदारीचा उपाय म्हणून अनेक व्यवहार बंद ठेवण्याला प्राधान्य दिले आहे. याचा विविध घटकांना फटका बसत असताना विवाह सोहळेदेखील यातून सुटलेले नाही. पुण्यात असाच एका विवाह सोहळ्याला कार्यस्थळ शोधताना कुंजीर कुटुंबाची अक्षरशः धांदल उडाली आणि अखेर कार्यालयात होणारा विवाह सोहळा घराच्या टेरेसवर विवाह सोहळा पार पडला.

पुणे: करोना विषाणूच्या प्रादुर्भावामुळे सध्या राज्य सरकारने खबरदारीचा उपाय म्हणून अनेक व्यवहार बंद ठेवण्याला प्राधान्य दिले आहे. याचा विविध घटकांना फटका बसत असताना विवाह सोहळेदेखील यातून सुटलेले नाही. पुण्यात असाच एका विवाह सोहळ्याला कार्यस्थळ शोधताना कुंजीर कुटुंबाची अक्षरशः धांदल उडाली आणि अखेर कार्यालयात होणारा विवाह सोहळा घराच्या टेरेसवर विवाह सोहळा पार पडला.

पुण्यात घोरपडी येथे राहणाऱ्या मनोज कुंजीर यांचा विवाह सोहळा गुरुवारी (१९ मार्च) रोजी नियोजित करण्यात आला होता. करोनाचा प्रादुर्भावाची चिन्हे दिसू लागल्याने साधेपणाने आळंदी येथे विवाह करण्याचा विचार कुंजीर कुटुंबाने केला. मात्र करोनाचा विळखा वाढू लागल्याने स्वारगेट येथे असलेल्या एका गणेश मंदिरात मोजक्या पाहुण्यांच्या उपस्थितीत विवाह करण्याचे नियोजन केले. मात्र लग्नाच्या ऐन दोन दिवस आधी मंदिरे देखील बंद झाल्याने तेथेही विवाह होऊ शकणार नसल्याने ऐन वेळी कुटुंबाची धांदल उडाली.

घराजवळील एक छोटा हॉल मिळवण्याचा प्रयत्न केला मात्र तोही मिळू शकणार नव्हता. ऐन एक दिवस आधी लग्न सोहळा पुढे ढकलणे देखील शक्य नव्हते. अखेर कुंजीर कुटूंबीय राहत असलेल्या इमारतीच्या टेरेसवर लग्न सोहळा उरकण्याचे कुटुंबाने ठरवले. गुरुवारी दुपारी सताराहून वधुचे मोजके कुटुंबीय पुण्यात आले आणि दुपारी ४ वाजता मोजक्या २५ ते ३० कुटुंबीयांच्या उपस्थितीत हा लग्नसोहळा पार पडला.

साधेपणाने करण्याचा ठरवलेला लग्न सोहळा ऐनवेळी इतक्या साधेपणाने पार पडल्याने कुटूंबाचा हिरमोड झाला खरा मात्र करोनाच्या पार्श्वभूमीवर खबरदारी म्हणून मोजक्या पाहुण्यांनाच बोलवून का होईना लग्न झाल्याचे समाधान असल्याचे कुटुंबाने सांगितले.